Къамаьл деш, керттера терко тӀаяхийтар туризма, промышленноста, вахара даькъ тӀарча хьала. Мехкадас белгалдир ГӏалгӀайчен туристически даькъ тӀа даьха толамаш: 2025 шера хьалхарча кхаь бетта 35 эзар гаргга туристаш хиннаб республике, из 16,5% дукхагӀа хул дӀадахача шера хинначул. Цо белгалдир, моттигера промышленни туризм дика дегӀайоагӀаш хилар. Тхо лаьрхӀа да тхоай предприятеш, масала «РИАК» яха кӀалах гӀирсаш деш йола завод е «Шолже» яха агрокомбинат мишта болх беш я гойта. Цо таро лу инвестицеш юкъеяха, кагирхошта юкъе балха моттигаш йовзийта»,-аьлар Келаматанаькъан Махьмуд-Ӏаьлас.

Мехка Кулгалхочо иштта дийцар номерий ганз дегӀайоагӀаш хиларх: хьаеллаш я керда модульни оала гостиницаш, кемпингаш, хӀаьта 2026 шера йистеяккха лерхӀ «Цӏайлоам» яха 100 моттига лаьрхӀа йола пхе седкъан отель.

Инвестицешка диллача, ГӏалгӀайче бизнес лелаяра дика хьалаш да: льготех да йоал телар, доазонаш паргӀата да хӀама хьадара, иштта паччахьалкхено новкъостал а лоаттаду. Мехка болх беш я йоккхий проекташ «Йоккха сомий беш», «Шолже» яха агрокомплекс, иштта кхыяраш.

Республикан Кулгалхочо хоам бир промышленни хӀама арахецар а лакхлуш доагӀаш хиларах, 2024 шера 11,6% лакхделар, цу юкъе 17 млрд сома инвестицеш дукхагӀа хилар. Агропромышленни комплексера хьал дика да, къаьстта бешамаш, хьайбаш леладеча.

ГӏалгӀайчен вахара даькъ тӀа а дика таронаш я, хьаеллаш я керда гӀишлош: 2019 шера денз, хьалъяьй 48 ишкол, иштта 50 берий беш. Дукха ха йоацаш Пхьилекъонгий-Юрта хьайийллар психоневрологически диспансер.

Цул совгӀа, Мехкадас белгалдир Татрий Республикаца бувзам лелабар лоархӀаме хилар. Маьтсела бетта регионашта юкъе барт бара кулг яздир промышленноста, юртбоахама, туризма даькъоша. Кастлуш, ГӏалгӀайчен викалаш гӀоргба Казане, дӀахо цхьана бувзам лелабара йолча таронашка хьажа.