Илдарха-ГӀалий тӀарча ишколай, берий бешамий лорий кабинеташка; эша гӀирсаш оттадергда
Шахьара прокурора чуденнача дехарах, Илдарха-ГӀалий тӀарча берий бешамашкарча, ишколашкарча лорий кабинеташка эшаш бола коачам Ӏалашбеш болх дӀахьоргба. Из хоам «Сердалога» бир Ӏаьдала болхлоша. Наьха унахцӀено лораярах болча оагӀон болхлоша белгалдечох, шахьаре 8 ишкол, 6 берий беш я.
ДӀабихьача тохкама балхо гучадаьккхар, лорий кабинеташка эшаш бола кхоачам боацилга. Плантографаш, оториноскопаш, сакхетам чура ваьннача сага бага фо чутоха эшаш йола гӀирс, грелкаш, болчакхаш, иштта дукха кхыдараш доацаш латт гӀо дара йола кабинеташ. Ӏаьдало оттаяь бокъо йохаеш да из деррига.
Шахьарерча прокуратурас кхален суде 14 искови дехар чуденнад; дешара моттигашта, дешареи Ӏилмани гӀулакхех йолча министерствога цига эшаш йолча хӀамай кхоачам бе, аьнна, тӀадуллаш. Беррига кхоачам ца хуле, цу гӀулакха бехке барашта 20 000 эзар сом гӀод тохаргда.
