Дагалоаттама улг хьадийллар Илдарха-Гӏалий тӀа, Россе Турпалхочун сийна
28.10.2025 09:49
Илдарха-Гӏалий тӀарча №2 йолча юкъерча ишколе сийлен улг оттадир, цу ишколе деша ваьгӀача Россе Турпалхочун Хамхой Адама, яхаш, дийцар «Сердало» газетага «Даьхен лорабой» ганза гӀалгӀай филиала зарбан болх лелабераша.
БӀухочун сийна Илдарха-Гӏалий тӀа гулбелар ганза вахара дешашца бувзабенна болх лелабераш: Темарханаькъан Ӏийса, Чиймарзанаькъан Марем, иштта бӀухочун гаргара нах, новкъостий, хьехархой. Сийлен улг хьаделла бокъо елар турпалхочун нанна Хамхой Хадижата.
Кхетачен доакъашхоша белгалдир бӀухочун денал, майрал, шийна йоккха чов хиннаяр аьнна доацаш, ший са къайладаллалца ротанна кулгал деш из венна хилар.
