ИнгНИИ балхага хьожаш хилар, боахамий юкъара комисси
Республикерча Ӏилма-тохкама института ахчанца, цигарча цхьацца гӀулакхашца бувзабеннача балха тохкам беш хилар, цу оагӀонцарча гӀулакхех йола комисси. ГӀалгӀай мотт лорабарах, боаржабарах бола керда оагӀув хьабийллаб цига. Къаьстта йоккха терко тӀайохийташ техкар институте хьачуухаш долча ахчанцара гӀулакх, болхлой штатни расписаненца дувзаденнараш, уставной каьхаташ, болхлоша кхоачашдеш дола декхараш.
«Институте хьаебеллаш болча кердача оагӀоно гӀалгӀай метта хьал тоадара тӀехьа мехка дӀабахьа лерхӀар боккха болх ба, дешара моттигашта лаьрхӀа дешара программаш арахецаш, гӀалгӀай меттацара орфографи тоаеш, кагирхошта юкъе наьна меттала нийса яздара гӀулакх доаржадеш, иштта берий бешамашка из гӀулакх юкъехьош», - дийцар «Сердалога» дешареи Ӏилмани гӀулакхех йолча министерстве.
Республикерча Паччахьалкхено тӀадилла вӀашагӀъелла я комисси. Цу юкъе дакъа лоацаш ба рузкъан гӀулакхех йолча министерствон, дешареи Ӏилмани гӀулакхех йолча министерствон болхлой.
ГӀалгӀай метта хьал тоадарах болча балха юкъе ларде дувшаргдараш къоастадерга комиссе.
