Шолжа кхалерча культуран цӀеной хьал тохкаш хилар, культуран гӀулакхах йолча Министерствон кулгалхо
Шолжа-кхален чудоагӀаш долча Эбарга-Юртарча, Алхастерча, Мужичерча, ГӀажарий-Юртарча культуран цӀеной хьал тохкаш хилар министр йола Лаьнанаькъан Залина. Иштта Орджоникидзе Серго цӀерах йола музей хьалъе аьнна къоастадаьча доазонга хьежар из. Наха болх беш йола моттигаш малагӀча хьале латт тахкар.
«Министраца цхьана цу моттигашка гӀолла го боаккхаш хилар Шолжа-кхален администрацен кулгалдеш вола Татенаькъан Ӏийса. Культуран цӀеношка дӀакхухьача программех, кхетаченех дийцар хьакимаша. Министра теркалдир, дукхагӀа йола культуран моттигаш куц эргадоаккхаш болх дӀабахьа безача хьале латтилга. Лаьнанаькъан Залинас белгалдир, ахчанца гӀо эшарал совгӀа, культуран цӀеношка шоай болх дика бовзаш, лакха начӀал дола болхлой эшалга», - дийцар тха «Сердалога» культуран гӀулакхах йолча министерствон зарбан болх лелабераша.
Культуран цӀеношкара болх боаггӀача боараме, бахархошта пайда хургболча тайпара дӀагӀоргболаш гӀо де лерхӀ цу мугӀарерча министерствос.
