Театре къахьегараш даькъалабийцар культуран министра
Дерригача дунен театра ди дездеча дийнахьа, вай аьттув ба, цу мугӀаре хьинаре къахьегаш, наьха дегашта боккха тоам беш, шоай лакхача начӀалца театра вахар тоадеш, хьабоагӀача болхлошта ловца баккха, баркал ала. Культуран гӀулакхех йолча министерствонна хьалхалаттача Лаьнанаькъан Залинас даькъалабийцар цу оагӀонца къахьегаш хьабоагӀараш.
«Театр вай мехкахошта езаенна, массане самукъадоалаш йола моттиг я. Вай республикерча диъ театре таханарча дийнахьа къахьегаш ва 500 лакха говзал йола болхло. ХӀара актёра, режиссёра хьалхашка латта декхар да, шоашка хьажа баьхкарий дегаш гӀоздахар, царна тоам хургболча тайпара сцена тӀара болх дӀабахьар. Шоаш гойтача хӀара балхаца наьха дегаш сомадаха гӀертача наха дукха низ Ӏобулл сцена тӀа. Аз даькъаладувц шо шун цӀайца! Аьттув болаш, могаш-маьрша долаш, иразе дахалда шо! Дуккха дика проекташ кхолла, хозача балхашца наха тоам беш дӀаходаха низ хилба шун массахана!» - аьлар министра.
«Сердало» газета болхлоша шоашкара даькъалабувц театра къахьегамхой. Кердача лерхӀамех, сийрдача уйлаех, безамах, вӀаший барт болаш дахарах дизза хилда шун денош! ХӀара оаш ловзаеш йола роль, хӀара спектакль шуга хьежарий дег чу южаш хийла!
