Спорта министра дакъа лаьцар «герга истол» яхача кхетачен юкъе
ГӏалгӀай Республикан физически культуран, спорта министр Белхарой Руслан дакъа лоацаш хилар, «Къилбаседа-Кавказа федеральни куран, Къулбехьен федеральни куран, иштта кердача исторически доазоний студентий спорт дегӀайоалаяр» яхача «герга истол» дӀахьоча, яхаш, дийцар «Сердало» газетага цу боахама зарбан болх лелабераша.
«Кхетаче вӀашагӀъеллар Шолжа-Гӏалий тӀа «УниверСпортФеста» чуйоагӀаш. Кулгалхочунца цига ваха хилар министра гӀонча Султиганаькъан ТӀахӀир, министра гӀонча Йовлой Мухьмад. Цига дийцача къамаьла юкъе дар Къилбаседа Кавказа моттигашка студентий спорт дегӀайоалаяр, цунна кагирхой юкъеозар, спортивни хьалаш массанега дӀакхоачаш хилийтар, иштта царца къахьегаргдола нах Ӏалашбар. ВӏашагӀкхийттача доакъашхоша лаьрхӀар шоайла бувзам чӀоагӀбе, дӀахо студентий спорт дегӀайоалае кийчо еш бола болх дӀабахьа», - аьлар хоамо.
Белгалду, «УниверСпортФест» дӀахьош я, «Физически культура, спорт дегӀайоалаяра» паччахьалкхен программа хилар бахьан долаш, из хьаллоац Россе спорта Министерствос, ЧР спорта Министерствос, Россе студентий спортивни Союзо, иштта А.А. Кадырова цӀерагӀча Нохчий паччахьалкхен университето.
