УнахцӀенон министра, бахархой тӀаийбеш, ди дӀадихьар
Министерствон хьалхалатта Ӏалбаканаькъан Зара, бахархой тӀаийбеш, цар хаттараш доашхаш, хилар. 27 мехкахо тӀавера цига, цхьацца гӀулакхашта тӀагӀолла. УнахцӀенон оагӀонца дувзаденна тайп-тайпара хаттараш дар наьха.
«Молхаш эшарца, санаторе хьожабарца, халача лазара дарба даьчул тӀехьагӀа дӀахо меттавоагӀаш де дезарашца, кхыча регионашка дарба де вахарца дувзаденна дар наха къувлаш хиннараш. ХӀара хаттар тохкаш, доашхаш болх дӀахьош я министр. Цхьацца долча хаттарех дарбанчешка этта гӀулакх тахка, аьнна, тӀадиллар цо», - дийцар «Сердалога» министерствон болхлоша.
Бахархошта, хьакимашта юкъе бувзам хиларо кхоачамбоацараш дикагӀа довзийт. Цхьаккха а сага хаттар тесса дутаргдац. Телевидене гӀолла дӀакхухьача передачашка дакъа лоацаш, нахаца массахана бувзаме хила хьож министр, хӀаьта бахархошта тахан из чӀоагӀа лоархӀаме да.
