Миннаца терроризма духьалара баннераш оттаяьй
ГӀалгӀайчен къаман политиках йолча Министерствос оттайир республикан 25 юкъарча моттиге терроризма духьале еш йола баннераш. Болам дӀахьош ба терроризм, экстремизм юхатоха, царна духьале лоаттаяра йолча кхетаченашта чубоагӀаш, яхаш, дийцар «Сердало» газетага хоамо.
Из кхетаче дӀахьош хилар дувзаденна да - наха цу ийрчача гӀулакхах бола хоам дукхагӀа бовзаргболаш, иштта царна де дезар фуд хьалхадаккха дагахьа.
«Терроризм, экстремизм юхатохара, цо деш дола зе мел доккха да наха дӀахайтара даькъ тӀа уж баннераш оттаярах хьабоала пайда боккха ба. Тхо тешаш да, цу хьало кхы а дикагӀа из болх чӀоагӀбе таро лургья аьнна», - аьлар министра Мизенаькъан Руслана.
Баннераш оттаяьй дукхагӀа нах лелача, дукхагӀа вай бахархой чулоацаргболаш, фийла хила безилга царна хьалхадоаккхаш.
