Дешархошца бувзам лоаттабу спортах йолча министерствос
Ӏаьлий-Юртарча № 1 йолча лицея дешархой хаттарашта жоп луш, «Классера кхетаченаш» яхача проекта юкъе дакъа лаьцар спорта гӀулакхех йолча министерствон кулгалхочун гӀонча волча Султиганаькъан ТӀахӀира. Из хоам «Сердалога» бир цу моттигера.
«Кхувш латтараш нийсача наькъа, массахана спортаца бувзам лоаттабара тӀахьехаш болх дӀабихьар кхетаче. Султиганаькъан ТӀахӀира берашта дийцар вай мехка спорт йоаржаеш кхоачашде аьттув мел баьннарех, спортсменаш, уж Ӏомабераш хьаллоацаш йолча проектех», - йоах хоамо.
ЛоархӀаме хьаьша хиннача Олимпийски чемпиона Халмарзанаькъан Хьасана белгалдир, тахан кхувш латтарий кхычар ца хинна боккха аьттув болга, царна мел эшар долга.
Дзюдоиста ший тренировкех, ше хьабаьнача наькъах дувцаш чӀоагӀа раьза болаш ха дӀайихьар дешархоша.
