ГӀалгӀайчен спорта Министерствос даькъалабийцар, Россе Хьалхале къайсача котбаьннараш
ЛаьрххӀа йолча, могашалца халонаш нийслуча берий ишколе-интернате ше вахача хана, ГӀалгӀай Республикан физически культуран, спорта министра Белхарой Руслана даькъалабийцар; Россе Хьалхале къовсача эллиной-румий латарах котбаьннараш, яхаш, дийцар «Сердало» газетага цу боахама зарбан болх лелабераша.
«СовгӀаташ, грамоташ луш; Белхарой Руслана белгалдир; республикан цхьанкхийттача командо хьалхара моттиг а иштта пхи майдилг а яккхар лоархӀаме да, аьнна.
Цо хьехам бир къонача чемпионашта, массахана шоаш лаьрхӀачунга кхачара болча наькъ тӀа уж хилар ловш. Спортивни оагӀон кулгалхочунгара грамоташ елар Ерригроссийски къорача наьха юкъарлон кулгалхочунна Тоаркхой Руслана, тренерашта Налганаькъан Тимура, Налганаькъан ТӀахьира, сурдо таржамхочоа Ахтоланаькъан Хасолтанна», - дийцар кепайоазонга.
Белгалду, кхетаче йистейоалаш Белхарой Руслана ишкола дешархошта говзанч-хьехам бенна хилар.
