Вайцига холера даржар харцдир унахцIенон гIулакхех йолча министерствоc
Холера яха у мехка даржар бух боацаш арадаьнна къамаьл долга белгалдир унахцIенон гIулакхех йолча министерствон болхлоша. Из бакъдоаца хабар тахан даьржа да интернета оагIонашка.
«ДIадахача шера даьржа хинначун куц долаш да хIанз доаржадаьр а - кхыметтел оттадаь сурт, яздаьр а иштта да. Молаш долча хица холера да яхараш, дер дайнараша шоашкара арахийца къамаьлаш да.
Белгалде дезаш да: цу хоама тIа ювцаш йола сиха оарцагIа ухарий дарбанче (БСМП) вай мехка яц. Цу гIулакхо хьагойт, боаржабаьча хоама тIа дувцар вIалла бакъ хила йиш йоаца, шийгара дагалаьца яздаь хIама долга», - дийцар «Сердалога» министерстве.
Бахархошка кхайкарал ду, боккъал а бух боацаш арадувлача къамаьлех ма теша, моллагIа бола хоам эггара хьалха тахка беза. Республикера цу оагIонцара гIулакх лертIа да. Интернета оагIонашка гIолла каст-каста арадувл бакъдоаца хабараш. МоллагIча хIамах тешар, нах корзагIбахар харцахьа да.
