ГӏалгӀайчен МКЖР дӀаболабу кхоллама гуллам
ГӏалгӀай къам мехкахдаккхара дагалоаттама Мемориальни комплексо хьакайкаду «ZaПобеду» яха нах вIашагIкхетар дӀадолалуш хилар, кхувш йоагӀача тӀехьенна Даьхен исторе оагӀонаш йовзара тӀахьехаш дола. Боламо дешархошта таро лу дӀаяхача ханашта терко тӀаяхийта, шоашта цох хетар ала шоай искусствага, сурташка гӀолла.
«Доакъашхошта могаду Мемориала комплекса цхьан лоархӀамеча тӀема хетабаьча гойтама уллув сурт даккха. Тӏехьашкахьа латта йиш я исторически тӀема техника, «Акхача дивизен» скульптура, тӀеххьарча Брестски крепость лораяьча бӀухочун Барханоевна, Афгански тӀема хетадаь дола сийленг е кхыйола моттиг», - аьлар «Сердало» газетага из болх вӀашагӀбеллараша.
«Юхасаца сурт» яха гуллам лаьрхӀа ба оагӀой бетта 9-ча дийнахьа гойта, шоллагӀча дийнахьа кхелахоша хьакъоастадергда котваьннар малагӀа ва, лайкаш увттаяь хиларга а йоазошка а хьежжа. Эггара дикагӀча суртий авторашта дагалоаттама совгӀаташ лургда, уж хургда исторически дагалоаттам лорабеча цар кхоллама дакъа юкъедена хиларах луш.
