Боккхача дезала даьна хьа ца луш лоаттадаь берий ахча хьаделар
Сага бокъонех вола ГӀалгӀайчен викал юкъевахачул тӀехьагӀа, Илдарха-ГӀалий тӀа вахача боккхача дезала даьна доагӀаш хинна берий ахча хьаделар. Вахара лоадама ганза соцадаь латташ дар 100 % дала дезаш дола берий ахча, из мехка вахара таронаш хилара боарамга хьажжа луш да, яхаш, дийцар «Сердало» газетага ГӀалгӀай Республикан УПЧ хоамий-аналитически даькъ тӀа.
«Наджгоанцхой бетта, паччахьалкхен хьалий оагӀонга гӀолла аз дехар чуденнадар, хӀара бетта берашта Ӏаьдало луш дола ахча хьаэца дагахьа. Цхьа ха яьлча, сона жоп делар, 75% мара из хьожаде йиш яц, аьнна; со цунна раьза хиланзар, цудухьа венав со ГӀалгӀайчен сага бокъонаш лораю керттера викал волча», - аьлар цо.
Цун лоткъамга ладийгӀачул тӀехьагӀа, яздаь дехар дӀадахьийтар Соцганзе сага бокъонех волча викало, тӀаккха хьал меттагӀ а даьлар.
Цига гучадаьлар, Соцганзо цунна хьожадаь ахча нийса доацилга. Карарча шера, наджгоанцхой бетта денз маьтсела беттага кхаччалца, хьа ца луш лоаттадаь ахча деррига а хьаделар.
