Дукха бераш долча ноаной пенсеш лакхде дага ба
Вай мехкарча 14 эзар совгӏа болча, дукха бераш долча ноаной пенсеш лакхдарга хьожаргба республикерча РФ пенсех йолча моттига болхлой. Из хоам «Сердалога» бир СФР зарбан болх лелабераша.
«Укх шерарча бокъон юкъе цу оагӏонца хувцамаш хиннад. Пенсе баха кийчлураш, е балхара цӏагӏа сайцараш юкъелоацаш да уж хувцамаш», - йоах тхогарча хоамо.
Тахан белгалдечох, берий цхьа шуи ах шуи даллалца доал деш йола ха, бераш мел да хьежжа доацаш, юкъегӏоргья пенси къоастадеча. Хьалхагӏа диъ берага хьажар додар стажа юкъе. Берага хьожаш йолча хана (цхьа шуи ах шуи даллалца) тӏакхеташ да коэффициенташ: 2,7 - хьалхарча бера, 5,4 - шоллагӏча бера, 8,1 – кхоалагӏчоа, иштта дӏахо хургдолча берашта.
СФР чудала деза дехар е Госулслуги портале дита деза.
«Бераш ураоттадеш къахьегача ноаноша дер теркалдеш дола дика да из. Пенсецара гӏулакх ма хулла аттачахьа даккха гӏерт тхо кхалнаха. Пхиъ е дукхагӏа бераш долча ноаноша дехар чудала деза из аьттув хьаллоацаш», - аьлар республикерча СФР Оагӏон хьалха латтача Йовлой Зубейрас.
