Лораш чубола машинаш юрташка, шахьарашка дӏа-хьа ухаш хилар аьттув болаш да бахархошта
Лораш чуболаш машинаш я тахан мехкарча моттигашка гӏолла, бахархошта паргӏато еш, дӏа-хьа ухаш. Шоай могашалла хьал тахка, лорашца къамаьл де, дагабала аьттув ба Эккажкъонгий-Юртарча, Наьсар-Кертерча, Аьлтий-Юртарча, Буро кӏалхарча бахархой. Из хоам «Сердалога» бир НЦРБ зарбан болх лелабераша. Цу юрташка бахача наьха лорашка чакхбала аьттув ба укх адресех: Эккажкъонгий-Юрт, Шериповгӏар цӏерах болча урама № 22; Наьсара-Корт, Бузуртанаькъан цӏерах болча урама № 3, Аьлтий-Юртарча Суворова оалача урама № 7, Бурокӏалхарча Дзортанаькъан Э. цӏерах болча урама № 7.
«Бахархошта лорашта тӏабахар атта де гӏерт тхо. ПМК - боккха аьттув ба тахан. Шоаш бахача моттигера арабовла ца безаш, дегӏа хьал тахка торо я наьха», - дийцар «Сердалога» НЦРБ керттерча лора декхараш кхоачашдеш йолча Йовлой Фатимас.
Бахархошка кхайкарал ду лораша; тӏехьа ца а тетташ, ханнахьа дӏатӏадахе, шоай дегӏа хьал тохкаш хила, яхаш. Ишттача гӏулакхо хӏетта хьакхийттача хана гучадоаккх моллагӏа лазар, хӏаьта из эггара лоархӏамегӏдарех да. Бахархошта атто е аьнна йолаялийтай лораш чубола машинаш, пайда эцаш хила деза вай цу гӏулакхах.
