Студента Ди дезде бех вай мехкара кагирхой
Ерригача Россе студентий Ден хетаяь кхетаче дӏахьош ба, мехкарча кагирхой гӏулакхех йолча Комитете. Из хоам «Сердалога» бир КДМ болхло йолча Гӏулой Аминас.
Наьсарерча ТЦ «АлифМолл» «КиноСтар» яхача кинотеатре хьокхаргдолча «Аватар 3» яхача кинога хьажа аьттув ба студентий мах боацаш, шоай студенчески билет дӏахьекха. Тахан 12.10, 15.30 дӏадолалургда кино. Иштта Наьсарерча «Аьрзи», Магасерча «Башлоам» яхача шан моттиге когсоалозашца хехкабала аьттув ба цар, 9 сахьатагара диъ сахьат даллалца.
«Хьо дӏаволале» яхача проекта моттигерча тоабо мехкарча кагирхой моттигашка фестиваль дӏахьоргья цу гӏулакха лаьрхӏа. Хӏаьта Гӏалгӏай паччахьалкхен университета культуран оагӏонцарча моттиге хьаьшашта кийчъя концертни программа, мехкарча тайп-тайпарча балхаш леладеш болча пхьарашкара гойтама балхаш, ИнгГУ тӏема дешара оагӏонгара балхаш хургда.
Физически культурахи, спортахи йолча министерствос хьаллоацаш, дӏахьош я из кхетаче.
