Вахарерча кхерамечарех лорабу кагирхой
10.07.2024 10:06
Вахаре нийслуш долча зуламех, кагирхой лорабеш бола болх ба республике дӀахьош. МВД болхлоша, кагирхой политикахи туризмахи йолча министерствон викалашца цхьана, терроризм, наркомани яхача доккхача зуламех кхувш латтараш лорабара хетаяь кхетаче дӀайихьар Наьсаре. Из хоам «Сердалога» бир цу гӀулакха хьалхалаттараша.
«Терроризм, наркомани яхача бӀехача гӀулакхех хьокхавеннача сага ший вахар мишта толхаду дийцар кагирхошта. Дийцарашта тешал деш, цу зуламашта юкъебахача наьха вахаре эттар довзийтар кхетачен доакъашхошта», - аьлар спикер волча Гоамакортанаькъан Мустафас. Кхетачен шоллагӀча даькъе министерствон болхлоша дийцар, тахан кагирхой терроризма юкъеоазараша леладеча наькъех.
