Мехка кулгалду 5 шу дизарца, Макшарипа Махьмуд-Ӏаьла даькъалавийцар къонача гвардейцаша
Республикан хьалха латташ пхи шу дизарца, даькъалавийцар вай Мехкада Келаматанаькъан Махьмуд-Ӏаьла «ЦаӀ йолча Россе къонача гвардейцаша». Из хоам «Сердалога» бир цу моттигерча зарбан болх лелабераша. Доккха баркал оалаш, цо мел даьчун хам беш, даькъалавувц хьинар дараша Мехкада. Могаш, маьрша волаш; иразе, аьттонца, дага мел латта дикаш кхоачашхулаш, вахалва яхача дешашца, мехка кулгалхо дагалоацаш ба уж.
«Хьо хьалха латташ, хьатӀавенача дийнахьа денз, Ӏа тӀатеӀӀа къахьегаш; доккха, дика хувцамаш хиннад мехка. ГӀалгӀай мохк тоабеш, тахан дӀахьош латтар, хам баь варгвоацаш, боккха болх ба. Мехках дог лазаш, бехктокхаме ший декхараш кхоачашдергдола тоаба вӀашагӀъеллай Ӏа.
Тахан массанена гуш да культуран, дешара, унахцӀенон, иштта кхыдолча оагӀонашкара хувцамаш. Баркал хьона, тха хьамсара Мехкада!» - белгалду кагирхоша.
