Къона архитектораш дипломни балхаш деш ба
Дешар йистедаьнна хиларца, ГӀалгӀайчен юкъерча болх Ӏомабеча дешара моттигашка дипломни балхаш яздеш да. Укх деношка, архитектуран, дизайна, реинжиринга колледжа дешархочо Цхьорой Микаила ший болх дика дӀачубелар, яхаш, дийцар «Сердало» газетага колледжа викалаша.
Студента хьалхашка лаьтта декхар дар, кхозза вӀаштӀара яь колледж классически кепара а йолаш, ма хулла дӀаяхача заман болх юкъе а боаккхаш йола проект оттаяр. ЗӀамсага яхачох, эггара халагӀа цунна хиннар дар шоайла тарлуш йоаца ши оагӀув вӀаший хотта езаш хилар. Классиканна чудоагӀараш сийрда бесаш, герга гомаш, шерача архитектуран балхаш да. Готиканна чудоагӀараш да, лакхал а йолаш, цу чу баьде бесаш а долаш, дукха сурташ а долаш. Иштта халонаш цу юкъе нийслой а, зӀамсага шийна хьалхашка лаьтта декхар кхоачашдир, цудухьа цун къахьегама боагӀача беса мах оттабир», - аьлар хоам баьчо.
«Кастлуш тхона гургда дукхача ханашка сатийса дипломаш. Из тӀеххьара гӀа бац са, со лерхӀаш ва лакхача дешара моттигашка дӀахо деша.
Са безам ба каьхаташ кхаьннахьа дӀачудала, Казанерча паччахьалкхен архитектурно-гӀишлон университете (КГАСУ) КГСУ, Москверча паччахьалкхен гӀишлон университете (НИУ МГСУ), иштта Москверча архитектурни институте (МАРХИ)», - аьлар 20 шу даьннача Цхьорой Микаила.
