Юкъара болх беча къоначар дӀахо а цӀий дӀалу
ГӀалгӀайчен къона юкъарлонхой, шоашкара масал гойташ, дӀахо а цӀий дӀалуш ба. Цар дакъа лаьцар хӀара денна дӀахьоча боламе, Наьсарен Республикански цӀий тохара йолча станце вӀашагӀбелла а дӀахьош а ба из, яхаш, дийцар «Сердало» газетага ГӀалгӀай Республикански кагирхой комитето.
«ЛоӀамхой тароний центра болхлоша, раьза а болаш, лаьрххӀа дӀаделар цӀий, кхыча сага вахар кӀалхардаккхара. Уж тешаш ба шоаш хьалаьца никъ наха дика гӀулакх дечарех цаӀ болга, шоашта цох дехаш хӀама а доацаш.
Цу тайпара гӀулакхаш леладаро вахара бехктокхам хилар а гойт, наьха йоакхо еш хилар а гойт», - аьлар хоамо.
«Цхьана дӀахо дӀахьу дика Ӏадаташ, цу юкъе шоашта бовзараш а боахаш. Шо цу юкъе хьинар долаш хилар лоархӀаме да», - аьлар болама доакъашхоех цаӀ волча Ӏалбакханаькъан Дауда.
