Набахта чуялла 9 шу ха техар, наркотикаш йохкарах
Ставрополе яхаш йолча кхалсага 9 шу набахта ялла ха техар, героин яха наркотик йохкаш из хиларах, яхаш, дийцар «Сердало» газетага республикан бокъонаш лораераша.
«ГӀалгӀай Республикан Магаса кхален судо хьадийллар, хьалхагӀа суд яь хиннача кхалсага духьалара уголовни гӀулакх.
Судо техкар, дӀадахача шера аьхки 15 грамм совгӀа героин ГӀалгӀайчен даькъ тӀара, юхайохкар духьа, цо ийца хилар. Деррига а дика бовзаш болча наькъа ларах деш дар. Из йохка лаьрхӀар, саг юкъе а воацаш, ца хилча сатохаргдоацача нахага маьхал а йоахаш, къайлагӀа зӀамигача тӀормигашка а ехкаш, хьаэца ховргдолча моттигашка Ӏо а ехкаш», - дийцар мехка Прокуратуре.
Ираза, ше лаьрхӀар чакхдаккха цун таро хиланзар: полицейскеша из хьалаьцар. Цар хьаяьхар цунгара, хьоарчаяь хинна, наркотикаш.
Судо цунна 9 шу ха техар. Из цо токхаргья набахта.
