Футболах йола вай мехкара чемпионат, массане дегаш ураоттадеш, дӀаяхар
19.08.2024 10:34
Селхан дӀайихьача футболах йолча чемпионато ураовттадир йиъэ тоабан доакъашхой дегаш. Из хоам «Сердалога» бир спортсменашта хьалхалаьттараша.
«Шаккха тоаба цхьан лагӀа тӀа йолаш чакхдаьлар «Карца», «Реал Шолжа-Шахьар» яхача оагӀон ловзар. Кхоартой Мухьмад, Янарсанаькъан Мухьмад бар голаш чуяьхараш. ШоллагӀча даькъе беррига низ гулбаь духьалъэттар «Карца». Дикка белгалваьлар цу ловзаре Мазенаькъан Мухьмад», - йоах хоамо.
«Барс», «Ӏаьлий-Юрт» яхача тоабашта юкъера ловзар Ӏаьлий-Юртарча Налганаькъан Идриса, ГӀанажанаькъан Мухьмада аьттув боалаш, 2:0 йолаш чакхдаьлар. Тахан пхи сахьат даьлча «ВӀовнашке» «Бартаца» ловзаш хургья, «Асса» араяргья «Шолжа» духьала.
