Паччахьалкхен 100 шу дизара хетаяь, Эльбруса тӀа вай къаман байракх йоаржайир
14.08.2024 09:24
Европе, Россе эггара лакхагӀа болча лоам тӀа Эльбруса тӀа баьнна, вай къаман байракх йоаржайир мехкахоша. ГӀалгӀай паччахьалкхен 100 шу дизара хетаяь я из моттиг. Атта доаца из гӀулакх шийна дӀатӀаийцар ва цӀихеза альпинист ГӀуденаькъан Беслан. Из хоам «Сердалога» бир спорта гӀулакхех йолча Министерствера.
«Дукха шераш да Беслан из гӀулакх хьаллоацаш хьавоагӀа. 9 тӀаваьннав из Эльбруса тӀа, Маьт-Лоам тӀа бувларашта юкъе хул массахана. Эльбруса тӀа ваьнна, байракх йоаржае цунна дагадеха дукха ха яр. Иштта, доккхача цӀайца ший тайпара даькъалабувца воаллар из мохк», - дийцар тха газетага.
Хьалха оаха хоам баьбар, спорта гӀулакхех йолча министерствон хьалха латтача Белхарой Русланаца кхетаче йолаш, ГӀуденаькъан Беслана ше лаьрхӀачох дийцалга.
