«Дийна дош» яхача даькъе хьалхара моттиг яьккхар филологически факультета шоллагӀча курса студенткас Овшанаькъан Хьавас. Цо чӀоагӀа безам тӀаозаш дийшар цӀихезача поэтий йоазош, ладувгӀараш цецбоахаш, хоза хилар из оагӀув. ШоллагӀа моттиг яьккхар филфака кхоалагӀча курса студентка йолча Ӏалбаканаькъан Аминас, кхоалагӀа моттиг кхаьчар ФЭУ хьалхарча курса студенткана Овшанаькъан Дейсена.

Шоай байташ ешаш хиннарашта юкъе хьалхара моттиг яьккхар филфака магистранткас МутаӀаланаькъан Заидас. Цун байташ кӀоарга чулоацам болаш яр. ШоллагӀа моттиг яьккхар Овшанаькъан Хаде, цо кхелахой теркам тӀаозаш, хоза йийшар байт. КхоалагӀа моттиг филфака хьалхарча курса студенткайна Баркинхой Лейлайна кхаьчар, цун байташ а чӀоагӀа хоза язъяь яр», - аьлар «Сердало» газетага ГӀалгӀай паччахьалкхен университете.

Яхьан чаккхе еш, кхелахоша белгалдир; берригача доакъашхоша дика кийчо яь хилар. Цар хоза масал гойтар берригача филологически факультета студенташта.