«Ӏарамхи» курорте салоӀача наьха моттигаш дукхагӀа е лаьрхӀад
ГӀалгӀайчен «Ӏарамхи» яхача курорте лаьрхӀад, салоӀаш болча наьха моттигаш диазза дукхагӀа хилийта. ХӀанз цига болх беш я 134 фусам, цига туристаш дукха хьаухаш хиларах, уж тоъаш яц. 2019 шера, лоаман ГӀалгӀайче вера 6 эзар турист, хӀаьта карарча шера уж 21,5 эзар ва. Цунца дувзаденна номераш дукхагӀа хилийта лаьрхӀад, хьабоагӀача наха эшаш дола хьалаш лоаттадара.
«Керттердар да, фусамаш йолаш хилар. 2018-ча шера 84 фусам яр, хӀанз 134 я, бакъда тӀакхетараш кӀезига я. ХIанз «Кавказ. РФ» Акционерни хIармаца цхьана лаьрхӀад 620 фусамга кхоачаш уж хьае. Хетаргахьа, 2028 шерга кхоачаш, из проект кхоачашъяь яргья», - аьлар «Сердало» газетага «ГӀалгӀайчен курорташ» ООО генеральни директора Йовлой Мухьмада.
«Ӏарамхи» курорт улл ЖӀайрахьа кхален эггара хозагӀча моттиге, ГӀалгӀайчен эггара дукхагӀа туристаш ухаш йола моттиг а я из, хӀара шера из дукхагӀа наха юкъе йовзаш а йоагӀа. Фусамаш дукхагӀа хургйола болх баьчул тӀехьагӀа, хьаьшашта а лерттӀа хьалаш вӀашагӀдохкаргда, хоза салаӀа йиш хургйолаш.
