45 млн гаргга ахча хьожадергда Илдарха-ГӀаланна
Илдарха-ГӀалий тӀа эшаш йола керда моттигаш хьалъе аьнна хьакъоастадергда укх шера федеральни ганзера 44 858,6 млн сом. Уж я хин турбаш, хий лоаттаду моттигаш, догӀан хишта лаьрхӀа 15 км кхоачаш йола, цу юкъера 2,5 укх шера чуйилла лерхӀаш йола, начӀас дӀауха моттигаш. Из хоам тха газетага бу гӀишлошъяра балхах йолча Министерствос.
Иштта цу шахьаре дӀадоладе лерхӀ 6,1 эзар кв. м лоацаш дола гӀишлон балхаш. Ер шу йистедалалехьа, кердача, пхезза вӀаштӀара даьча цӀагӀа нах дӀачубахийта лерхӀ. Нах бахаш йола моттигаш тоаяра тӀехьа кхеллача федеральни проекте гӀолла дӀахьош ба из беркате болх.
«Моттигаш дегӀакхувлара (КРТ) лаьрхӀа дола доазув 55, 8 га кхоачаш да. Шахьаре хӀетта нах баха хайшача моттиге да из. Тхога беча хоамах, кхаь шера цу моттиге 18 эзар кв. метр гӀишлош хьалъе лерхӀ Ӏаьдало. Россе гӀишлон балхех йолча Министерстве эшаш дола ахча хьакъоастадарах дехар чуденнад вай республико.
КРТ проект йоаржаеш 2025-ча, 2027-ча шерашка дӀабахьа беза болх 260 млн сомага кхоачаш ба, хӀаьта Илдарха-ГӀалий тӀа цу юкъа хьалъе лерхӀа гӀишлош 18, 6 эзар кв. метрага кхоачаш хул», - дийцар тхога министерстве.
