Къаман библиотеке кастлуш хургда, «Вахара бӀаьсти» яха Коазой Тимура роман
НачӀал долча поэта, прозаика Коазой Тимура Янданаькъан Жамалдий цӀерагӀча Къаман библиотеканна дика совгӀат даьд. Керттерча библиотеканна ший керда «Вахара бӀаьсти» яха кхоллам белар цо, из книжка арадаьннад карарча шера.
Къаман йоазонхочо керда исбахьален книжка арахецар, гӀалгӀай литературанна лоархӀам болаш да, из дегӀадара, мах болаш хилийтара новкъа.
«Коазой Тимура дувцар вай ханарча ГӀалгӀайчен вахаре нийслуш да. Цун керттера турпалхо Элла, университета студентка, начӀал дола суртанча я.
Ший тайпара хоза, дунен бала боацаш, дӀадолалу цу йиӀий вахар, бакъда кастлуш «Ӏаьржа морхаш» тӀайоагӀа цунна. Цигара дӀадолалу хувцамаш…
Хетаргахьа, дешархой безам тӀагӀоргба цу романа, из деша йиш я тха дешара зале», - аьлар «Сердало» газетага ГӀалгӀайчен къаман библиотеке.
Из кхоллам байзача, библиотека болхлоша Коазой Тимура ловца боаккх, цо дӀахо а керда романаш арахецар, цун кхоллам безараш совбувлаш хилар ловш.
