Россе яхьашка шоай говзал гойтаргья къонача Ӏалам лорадераша
Экологически проектех йолча ерригача Росcе моттигерча «Волонтёрашта деррига мог» яхача яхьашка котало яьккха ворхӀ саг федеральни оагӀонцарча яхьашка вай мохк гойташ хургва. Из хоам «Сердалога» бир Ӏалам лорадерша.
«ГӀо деш йола, экологецара гӀулакхаш доаржадеш йола региональни яхьаш чакхъяьлар республике, дешархошкара 40 совгӀа экологически проекташ гулъелар цига», - йоах хоамо.
Котало яьккхараш ба Инаркъерча № 12 йолча ишкола дешархой, Илдарха-ГӀалий тӀара №1 йола ишкол, Буро кӀалхара № 2 йолча ишколо кхебаьраш, иштта «Олимп» яхача лакха начӀал долча лицеера дешархой.
Яхьашка тӀахьожам бераш Ӏалама гӀулакхех йолча министерствон болхлой бар. Котбаьннараш даькъалабийцар цар, дог ураоттадеча дешашца, аьттонца, хьинарца дӀахо цу наькъ тӀа дӀачакхбала тӀахьийхар.
