Хиш лорадеш, эггара хьалха де дезарех, кхетаченаш дӀаяхьа лерхӀ вай мехка
Цох лаьца дийцар Малхбузерча Каспийска Бассейнови куран тӀа дӀайихьача моттигерча совета кхетачене. Цига дакъа лоацаш хилар республикерча Ӏалама кхоачамахи, экологехи йолча Министерствон кулгалхочун гӀонча вола Мизинаькъан Микаил. Из хоам «Сердалога» бир министерствон къахьегамхоша.
«Малхбузерча Каспийска Бассейнови куран моттигерча совета Курбанчев Гусейна кулгал деш йола 31-гӀа кхетаче дӀайихьар Махачкале. Мехкарча миӀингашкара дукха адам дар цига гулденна. Кхетаче дийцар хиш лорадарах долча керттердарех, цу оагӀонца дӀабахьа безача боккхача балхах», - йоах тхога бенача хоамо.
2025-ча, 2027-ча шерашка РФ моттигашкара хин гӀулакх тоадеш, цигара хьал ма хулла меттаоттадеш, дӀабахьа безача балхах хьоахадир кхетаче. Наьсар яхача хин доазув, МагӀалбикерча Ӏама гонахье тоаеш де дезарех дийцар. Хица ювзаенна моттигаш меттаоттаеш йолча федеральни проектага гӀолла дӀахьоргба из болх, 2025-ча шера дӀаболабаь. Цу гӀулакхех болча болхлоша белгалдечох, ханнахьа хин кӀалхара, гонахьара моттигаш йоархӀех, чуйийшача бӀехача хӀамаех цӀенъеш хиларо хин Ӏаламца дувзаденна хьал лораду.
