Ерригача Россе яхьашка, шозлагӀа котало яьккхар наьсархоша
Исторически моттигашта, йоккха йоацача шахьарашта юкъе дӀахьоча лоархӀамеча яхьашка котало яьккхар вай Наьсарен-Шахьаро. Из хоам «Сердалога» бир гӀишлошъяра гӀулакхех болча оагӀон болхлоша.
«Мехка исторе эггара хьалха нийслу иштта хӀама. ЛоархӀамеча, йоккхача яхьашка шозлагӀа котало йоаккхаш я вай шахьар, ший хӀама тоадара тӀехьа 107 млн сом рузкъа тӀаозаш», - дийцар «Сердалога» гӀишлонхой Министерстве.
«2026-ча шера Коталон Аллей, цун гонахьара доазув тоадергда, салаӀа, волавенна лела керда моттигаш хургья цига, иштта лампаш егӀа, зизашца, гаьнашца тоаяь бос боаккхаргба цу моттига. Бахархошта, тӀабаьхкача хьаьшашта салоӀам беш хургда уж хувцамаш», - йоах тхогарча хоамо.
Белгалде деза, шахьара куц тоадеш дӀахьоча балха юкъе 107 млн федеральни оагӀонгара, 4,5 млн регионера, 9 млн муниципальни ганзера, 33 млн кхыйолча моттигашкара долга. 153, 5 млн сом ахча да шахьара керттера моттигаш тоае, аьнна, къоастадаьр.
Котало яккхарах дола совгӀат шахьара да волча Оздой Русланага хьаделар. Казане дӀахьош хиннача цу кхетаче, дакъа лоацаш вар из гӀишлонхой Министерствон кулгалхочун гӀонча волча Евкуранаькъан Мухьмадаца.
«Шахьара куц тоадеш, цун моттигий хьал хозача доаккхаш, къахьегаргда вай дикка. Йоккхий проекташ я йоаржае езараш», - белгалдир Оздой Руслана, аьттув баьнна, кхоана де дезараш къоастадеш.
