Шахьара куц тоадарах йолча яхьашка дакъа лоацаш я Наьсаре
Шахьара куц тоадарах йолча проектий Ерригача Россе яхьашка дакъа лоацаш я вай Наьсаре. Цига чудала дезача дехарах дувцаш, кхетаче дӀайихьар шахьара да волча Оздой Руслана ший гӀончанча йолча Мархенаькъан Миланайца, керттерча архитекторца ЦӀечой Басираца.
Из хоам «Сердалога» бир шахьара администрацера. Бахархошта юкъе дӀахьоргдолча хоржамашка харжа оттае езача моттигий къоастам беш ба администраце болхлой карарча хана.
«Къоастам баь моттигаш, вай чуденна дехар котало тӀехьа яхьаргйолаш хила деза. Шахьара куц тоадара юкъе цу моттиго малагӀа дакъа дӀалоац, из тоадар бахархошта мел лоархӀаме да, иштта кхыдараш а керте лоац яхьашка. Из болх дика бовзаш, кхеташ ма дий шо, цудухьа оаш из лакхача боараме чакхдаккхар деза сона», - белгалдир Оздой Руслана.
2024-ча шера шахьаро котало яьккхаяр цу яхьашка, бӀаьстан шоллагӀча бетта дӀадоладергда шахьарерча Ӏама гонахьара моттигаш тоаю балхаш. Проекта болх бовзаш хургба интернета оагӀонашка гӀолла.
