Керда исторически гӀишлош кораяьй ГӀалгӀайчен лоамашка
ГӀалгӀайчен ЖӀайрахьа-Ахабоарзен (Ассински) историко-архитектурни, Ӏалама музее Фуртоуг оалача зӀамигача юрта бахача наха, йовзаш йоаца хин хьайра, лаьттан кӀалхара кашамаш гучадаьннад. Цу тайпара цӀаьхха гуча яьнна моттигаш мах болаш я гӀалгӀай халкъа истори, культура тахкара. ДӀаяхача ханашка вахар дегӀадоаладеш, наха леладаь гӀирсаш да цар белгалдераш.
«Хин ши хьайра Фуртоуга 250-300 метр мара гаьна йоацаш я. Уж яда чухаьрца, царех пенаш мара дисадац. Цига бахача наха яхачох, 2002 шерга кхаччалца лоаман кхуркхолга 100 метр мара гаьна йоацаш яр болх беш хинна цхьа хьайра, цу аьхки чӀоагӀа догӀаш делхар бахьан долаш, Ӏаьржа денача хиво Ӏойихьар из.
Цу гӀишлон даькъ тӀара корадаьд иштта кашамаш, цига дӀабехкача наьха тӀехкаш кораяьй, цу ханашка баьхача наха дин оагӀорахьара доагӀаш ма хиллара, лаьттах дӀабехка хиннаб уж. Цу тайпара йиъ моттиг я.
Лакхе хьоахаяь моттигаш лораяра, республикан культурни тӀехьален гӀишлошта уж юкъеяхийтара, оаха доагӀаш дола тешалаш гойтаргда», - аьлар «Сердало» газетага ЖӀайрахьа-Ахабоарзен музее-заповеднике.
Фуртоуг яхача моттигера гӀала, ший архитектурни сийленгашца, лоаман кхуркхолгаца, Ӏоахарганаькъан ГӀапура цӀенца цӀихеза я.
