Рамадан бетта хоза гӀулакхаш карагӀдувлаш ба юкъара болх лелабераш
Укх езача хана, бахархошта юкъе беркате гӀулакхаш доаржадар хьаллоацаш ба мехкара юкъара болх лелабераш. «Дикача наьха клуб» яхача гӀо деш йолча ганза болхлоша кхачан тӀормигаш дӀадийкъар боккхача наха укх деношка. Из хоам «Сердалога» бир цу гӀулакха хьалха латтараша.
«Эшаш йола хӀамаш яхьарал совгӀа, царцара лерхӀам, безам дӀахьокха гӀерт ганза болхлой. Царца цхьана марха даьста, бусалба нах шоайла къахетаме, тӀера хила безилга дӀахьекха дӀабахар уж. Ха яхача кхалнаха шоай вахарера цхьацца хӀамаш дийца, вахара наькъ тӀа накъадаргдараш хьалхадаьхар къонабарашта», - дийцар тха газетага.
«Дезал оал, хьа цӀийх беце а, эшача хана даиман хьона уллув хьа оагӀув хьаллоацаш латтарех. Иштта беркате сайренаш дуккха а хийла! ЗӀамига терко йича а доккха хет ха яхача наха, дукха хӀама эшац цар дог хьаста. Новкъостал эшарашта юхегӀа хила деза вай массахана, царна даь дика доккха хургда», - дийцар Орцханаькъан Луизас.
