Хиш цӀенду кердача хьисапера моттигаш хьалъеш латт Шолже
Шолжа-Шахьарерча хиш цӀендеш йолча 16 эзар кубометра йолча моттига болх тахан 50%-га кхоачаш (48,8) кийча ба ала йиш я. Из хоам «Сердалога» бир гӀишлон балхех йолча Министерствос.
«2022-ча шера наджгоанцхой бетта дӀаболабир из болх. Шолжа-Шахьарера, Илдарха-ГӀалий тӀара, Эбарга-Юртара хиш цӀендеш хургья 5, 1 млрд сом ахча дӀалаьца йола из лоархӀаме моттиг», - йоах тхога бенача хоамо.
Йиллача ханал хьалхабоалаш болх дӀахьош ба цига карарча хана. Кхоачашдаьр кӀезига дац: гонахьара пенаш урагӀдихьад, эшаш дола гӀирсаш, аьшкаш Ӏочуувттаяьй, лакхе, гонахьа сэндвич-панелеш оттаяьй, иштта юкъера моттигаш къоастаеш болх дӀабихьаб. Боккха, лоархӀаме болх ба цига чакхбоаккхаш латтар.
Дукха хӀама да цу балхо чулаьцар, хӀаьта карарча хана даьр кӀезига дац. 26 саг, 7 машин я цига тахан къахьегаш.
Ткъо километрага кхоачаш йола начӀас дӀауха турбаш Шолжа-Шахьаргара Илдарха-ГӀалийга Ӏокхоачаш хургья. Шахьара экологически оагӀонцара хьал тоадара тӀехьа, чӀоагӀа лоархӀаме болх ба из.
2027-гӀа шу тӀакхачале йистедала дезаш да цигара балхаш.
