ГӏалгӀайчен 40% дешархошта дикал йола дӀайха даар лоаттаду
ГӏалгӀайчен ишколашка берий даар ший оттабаьча боарамах лоаттаду, яхаш, дийцар «Сердало» газетага ГӏалгӀай Республикан кулгалхочун зарбан болх лелабераша.
«Цу даькъ тӀа болх дика вӀашагӀбеллаб. Карарча шера дӀайха даар лоаттадергда 33 490 юххьанцарча классашка дагӀача, ерригача ишколашкарча 40% гаргга долча берашта. Керттера терко тӀайохийт берашта-заӀапхошта, СВО доакъашхой берашта. СВО доакъашхой 1 365 бера, мах боацаш цкъара луш дола дӀайха даар лоаттадергда», - аьлар мехка кулгалхочо Келаматанаькъан Махьмуд-Ӏаьлас.
ХьалхагӀа республике Ӏалашо йора цахаддаш ишколашка берашта даар лоаттадеш, дика хьалаш хьакхоллаш, республикан бюджетера ахча дӀадохийташ. Карарча хана а иштта де лаьрхӀад.
Дешархошта лоаттадеш долча даара дикалга хьож, эшар ийю моттигера юртбоахам лелабеча нахагара. Цу тайпара хьалаш леладаро таро лу къонача дешархой могашал лорае, иштта республикан юртбоахама болхлой къахьегам хьаллаца.
«Оаха тӀахьожам лоаттабу, даар дӀайха а дика а хилийтара, массанега дӀакхачийтара. ЛоархӀаме да, хӀара берага, къаьстта из эшачунга дӏакхачийтар, ишколе цун лерттӀа кхача хургболаш», - аьлар Макшарипа Махьмуд-Ӏаьлас.
