Сага бокъонаш лораечо, наха юкъера къовсамаш къестадарах болча оагӀон кулгалхочо кхетаче дӀайихьар
Сага бокъонех волча викала ЦӀечой ИбрахӀима, суде ца а кхоачийташ, наха юкъера къовсамаш дӀадоахача оагӀон хьалха латтача Тоачанаькъан Зоврбикаца кхетаче дӀайихьар Магасе. ВӀашагӀкхетаре дийцар, судага ца кхоачийташ, юкъера довнаш, къовсамаш дӀадахарах йолча института хӀама доаржадарах. Къаьстта йоккха терко йир, къовсамаш эттача моттигашка сага бокъонаш лораеш дӀабахьа безача балха.
«ВӀаший бувзам чӀоагӀбир, шинна моттиго цхьана болх дӀакхухьаргболаш. Сага бокъонаш кӀал ца юташ, гаьна ца доалийташ юкъера къовсамаш, цатоамаш боаггӀача боараме тоадарах дийцар хьакимаша. Сага бокъонех волча викала белгалдир, из бувзам шинна моттига эшаш, мехкахошта пайдане болаш хургхилар»,- хьоахадир «Сердалога» мехкарча УПЧ.
АНО «Судага ца кхоачийташ довнаш дӀадахарах йолча моттига» кулгал деча Тоачанаькъан Зоврбика дийцар, бахархошта юкъера цатоамаш кӀоарга ца долийташ, дӀадахара тӀехьа из болх лоархӀаме хиларах. Иштта цо теркалдир, цар цхьана болх дӀахьош хиларо цу оагӀонца дувзаденнараш дикка аттача даха тарлулга. Наха юкъера къовсамаш дӀадахара тӀехьа болх лелабеш йолча моттига гӀулакх, бахархошта дикка шерагӀа дӀадовзаргда хӀанз.
