Сага бокъонаш лораер пенсионера гӏулакхага хьежар
Гӏалгӏай Республикан сага бокъонех волча викала фусаме лоткъам бера Долакха-Юрта вахача сагагара, ший пенсе гӏулакха бокъонаш телхаяь хиларах дувцаш. Цо хоам бора шийна доагӏаш дола пенси дӏасоцадарах, пенси хьале аьнна судо цу тӏехьа баь соцам бале а.
«Из соцадара бахьан дар, Россе Вахара ганза болхлоша цу сагагара цхьа справка дӏаехаш хилар. Хӏаьта латкъаш волчо яхар да, из справка цу каьхаташта юкъе йоалл»,- хоам бу «Сердало» газетага Гӏалгӏай Республикан УПЧ хоамий-аналитически даькъ тӏарча болхлоша.
Лоткъам хьакхаьчачул тӏехьагӏа, сага бокъонех волча викало сиха теркалдир цун гӏулакх. Из техкачул тӏехьагӏа мара, цунна боагӏаш бола мах оттабе таро яцар. Тӏахьожама болх дӏабихьачул тӏехьагӏа, СФР меттаоттадир хьалхарча боараме ахча хьадалара гӏулакх-15 313 сом.
Таханарча денга кхоачаш, пенси да 16 257 сом. Цул совгӏа, цу сага хьаделар 2022-2025 шерашка соцадаь мел лаьттача хана доагӏаш хиннар а. Деррига ахча пенсионера банка чота тӏа хьатӏадера.
