Онкологаша дакъа лаьцар, «Вахара духьа» яхача Халкъашта юкъерча кхетаче
Тайп-тайпара Россе а доазол арахьара а балха хьалхале лелаю говзанчаш гулбелар Vӏӏӏ-ча Халкъашта юкъерча онкологе, радиотерапе Москве дӀахьош йолча кхетаче. ГӏалгӀайчера цига бахар республикански онкологически диспансера болхлой Малсаганаькъан Ювсап, Томбенаькъан Ӏалихан, яхаш, дийцар «Сердало» газетага ГӏалгӀай Республикан унахцӀенон Министерствон зарбан болх лелабераша.
Цу кхетачен белагало я - цун дувцача хӏаман чулоацам. Цӏийоацар - из лазар да, масса оагӀорахьара дарба дӀадехаш дола, цудухьа цига дувцар говзанчашта тайп-тайпарча доакъош тӀа карагӏдувлараш, чоалхане клинически хьалаш; иштта керда, хьалхале лелаю тохкамаш. Дика дакъа лацар цига онкологашца цхьана анеститезиологаша, терапевташа, гинекологаша, эндокринологаша, лучевой диагностика викалаша, эндоваскулярни хирургаша, кхычар.
«ГӏалгӀайчено цу тайпарча йоккхача профессиональни кхетаче дакъа лоацаш хиларо таро лу, дикагӀа дола дарбаш юкъедаха, профессиональни бувзам чӀоагӀбе, иштта онкологе лазарашта новкъостал дара дикал республике лакхъяра», - аьлар ГӏалгӀай Республикан унахцӀенон боахаме.
