Наркоманеца къовсам лоаттабу Ди белгалдир Юкъарча палато
Наркомани яхача доккхача зулама духьала къовсам лоаттабеча Денна хетаяь кхетаче дӀайихьар республикерча Юкъарча палато. Из хоам «Сердалога» бир ОП доакъашхо йолча Беканаькъан Хадижас.
Тайп-тайпарча говзалех йолча профессиональни колледжа студенташца хиннача къамаьла юкъе, теркаме лаьцар цу оагӀонцара керттердараш. Юкъарча палатанна хьалха латтача Ӏамарханаькъан Лейлас кагирхошта хьалхадаьккхар, наркомани яхача доккхача зуламо тахан наьха вахар мел халчаоттаду, цунна духьала къовсам лоаттабар хӀара сага декхар долга.
Республикерча СПИДа, кхыдолча инфекционни лазарашта духьала болх лоаттабеча моттига керттера лор йолча Бекмарзанаькъан Луизас къонача тӀехьенга дийцар, наркомани яхача зуламо шийна тӀехьа ютача ларах, бӀехача хӀаманца ший вахар толхадаьча сага тӀехьагӀа наха хьалхашка тешаме саг хинна дӀаотта мел хала да.
Кхетаче белгалдир, наркоманена духьала хӀара цӀагӀа, дешара моттигашка, болх беча моттигашка къовсам лоаттабе безилга. Кхетаче вӀашагӀъеллараша теркалдир, иштта дӀахьоча балхо кагирхошта юкъе пайда белга, дикача, беркатеча хӀаман уж тӀахьехилга.
