Отдела керте лаьттача хьалхарча кулгалхоша, чурча гӀулакхий подполковник Гаьгенаькъан Жабраил шоашта хьалха а волаш, ГӀалгӀай Республике гӀолла йолча Россе ОФСИН «Ангушт» ОСН лакхача боарам тӀа кхоачашду шоашта хьалхашка латта декхараш, яхаш, дийцар паччахьалкхен балха зарбан болх лелабераша.

«ГӀалгӀай къоаноша, 1770 шера тушола бетта, гӀалгӀай хьабаьннача лаьтта-Онгушт (Ангушт) яхача юрта, Российски имперена шоаш чубоагӀаш хиларах йола чӀоагӀо еш санна, цу лаьрххӀача подразделене болхлоша а тешшаме бокъонаш, законаш лораду республикан уголовно-таӀазар кхоачашдара даькъ тӀа.

ГӀалгӀайчен атта йоацача ханашка из спецназ вӀашагӀъеллар, цунна юкъебоагӀаш бар дегӀа ондагӀа а, унахцӀена а бола болхлой, мехка кхыча бокъонаш лораеча моттигашкара а бар уж», - йоах хоамо.

Цу къонача, лаьрххӀача даькъе, укх 16-тта шера дика Ӏадаташ хинна дӀаэттад барт болаш из коллектив хилар, уж лораду «Ангушта» чубоагӀача бӀухоша тахан а.

Отдела болхлоша каст-каста дегӀайоалаю шоай балха говзал. Цунна чудоагӀа тренировкаш дӀаяхьар, физически а балха а кийчо яр, герз тоха Ӏомавалар, тӀема кийчон даькъ тӀара техника, герза гӀирсаш, лаьрххӀа бола тӀема низ бовзар.

Массахана «Ангушт» дакъа лоацаш я тайп-тайпарча кийчон кхетаченашка, УИС болхлой кхерамзленна Ӏалашо еш, цу юкъе хьем боаццаш лахара балхаш дӀахьош.

«Ши чемпион ва шоай отдела сий доаккхаш спортивни яхьашка, уж ба толашагӀбараш. «Ангушт» ОСН кулгалхо, чурча гӀулакхий подполковник Гаьгенаькъан Жабраил - Россе спорта мастер ва вӀашагӀъийнача а, иштта кулгашца дегӀалвахара а долча латарах. Штурмовой отделене инструктор, чурча гӀулакха капитан Къоастой Артур - Россе дзюдох вола спорта мастер ва», - йоах хоамо. ХӀара шера, отдела болхлоша дукхагӀа дӀахьу Даьхенцара безам совбоаккха кхетам кагирхошта луш бола болх, 6 шергара 18 шерга кхаччалца ха яьннарашца дзюдо секцеш дӀахьу.

Белгалду, шоай декхараш дизза кхоачашдарах, къаьнагӀбарашта, отдела болхлошта совгӀаташ деннад. Уж ба шоай хьамсарча мехка хургдолча дикан тӀехьа масал гойташ, болх беш хьабоагӀаш.