Набахта лаьца боахкараш, гаргарча наха юхегӀа хургба
ГӏалгӀайчен сага бокъонех волча викала фусамга дехар дир мехкал арахьа лаьца боахкарий гаргарча наха, шоай кхоачара нах дезалашта гаргагӀа хургболаш хьалбоалабе, яхаш.
«Цу тайпара дехар дера сага бокъонех волча викалга, шоаш цхьацца долча бахьанех тӀехьааха таро йоацаш боландаь. Цар белгалдора, шоай дезал таро йоацаш ба, цунна юкъе заӀапхой а ба, яхаш. Дукха зе хулаш хиларах, тӀехьааха таро яц», - аьлар «Сердало» газетага ГӏалгӀай Республикан УПЧ хоамий-аналитически даькъ тӀа.
Цу тайпара, ГӏалгӀайчен сага бокъонех волча викала ФСИНаца цхьана болх дӀабахьарах, уж хьалбоалабе таро хилар Нохчий Республике. Из мохк дуккха юхегIа хиларах хержар, цо таро лу, лаьца боахкарашта тӀехьаводаш хилча, деш дола зе кӀезигагӀа де. Цо иштта хьаллоац дезалера бувзамаш, лаьцарий а цар гаргарча наьха а психологически хьал.
