Ший мехка юхерча моттиге, ха токхаш хургва лаьца воалла вайцигара вахархо
02.09.2024 11:26
Лаьца воалла ший воӀ республикан юхерча набахта ха такха вита, аьнна, оарц дийхар Шолжа кхалерча яхархочо, сага бокъонех волча викалгара.
«Набахта воалла са воӀ ха токхаргйолча моттиге дӀавига везаш ва. Со заӀапхо я, дегӀа могашал хӀара денна эшалуш латташ хиларах, гаьнарча моттиге цунна тӀехьааха аьттув хургбац са, цудухьа дехар ду аз, ма хулла юхегӀа йолча набахта ха такха вита из аьнна», - язду сага бокъонех волча викалга дог дехача кхалсага.
Росси ФСИНаца бувзаме ваьнна, АьдагӀий набахта из воалларгволаш, вӀаштӀехьадаьккхар сага бокъонех волча викала. «Сердалога» из хоам бир республикерча УПЧ.
