Низá чӀоагӀагӀа дола бераш хержар Илдарха-ГӀалий тӀа
Шахьарерча Заьзганаькъан Идриса цӀерах йолча стадиона тӀа дӀайихьар республикерча кагирхошта юкъера низá чӀоагӀагӀа дола бераш хоржаш йола спартакиада. Из хоам «Сердалога» бир Илдарха-ГӀалий тӀарча администраце.
«Спорта гӀулакхех йолча министерствос, шахьарерча мэре хьаллоацаш дӀахьош яр кхетаче. Берий дегаш ураоттадеш дола къамаьл деш йистхилар шахьара да Дидиганаькъан Ахьмад, спорта гӀулакхех йолча министерствонна хьалхалатта Белхарой Руслан», - йоах тхогарча хоамо.
Къонача спортсменашта юкъера эггара кадайгӀа, низ болашагӀа, чӀоагӀагӀбараш хьахержар цига. 60, 100 метр бовда безаш бар уж, иштта кулгаш ӀогӀертадеш хьалъийлуш, турника тӀа низ дӀахьокхаш чакхбала безар цар, муш дӀа-хьа увзабеш йолча спорте а дӀахьекхар цар шоаш низ.
Шолжа кхала, Илдарха-ГӀала хьагойташ бар къона спортсменаш. Иштта йолча кхетаченаша берий дог ураоттаду, спортацара бувзам, безам кхы а лакхагӀа хулийт.
