МЧСа болхлоша йийлла урокаш дӀайихьар мехка ишколашка
Граждански оборона, иштта Россе МЧС кхелла 35 шу дузаш, ГӏалгӀайчен ерригача дешара моттигашка дӀайихьар йоккха Ерригроссийски йийлла урокаш. Керттера дийца дош дар, «Массане теркамга!» яха хоам нийса тӀаэца хар.
«Россе МЧС говзанчаша хоадам боллаш дийцар дешархошта граждански оборона истори, цун керттера декхараш, таханарча заман дунен тӀа цун лерхӀам. Къаьстта терко еш яр, чоалхане хьал эттача ха езаш йола балха оагӀонаш. Дешар дӀахьош, берашта хайра фцу де деза «Массане теркамга!» яха хоам хьахезача, хьалхарча аргӀагӏа де дезар малагӀа да, мишта ше а шийна гонахьарбараш а кӀалхарбаха беза. Цӏерах кӀалхарваккхара болча болхлоша берашта хьалхадаьккхар, тайп-тайпарча чоалханеча хьалашка де дезар, цар гойтар эшаш йола къахьегама кечалаш, кӀалхарваккхара бола гӀирс», - аьлар «Сердало» газетага ГӏалгӀай мехка гӀолла йолча Россе МЧС Керттерча урхаллен зарбан болх лелабераша.
Цига беннача хьехамо новкъостал дергда дешархошта, чоалхане хьал эттача фу де деза харал совгӀа, цар шоай гаргара нах а Ӏомабергба.
Цу тайпара кхетаченаш дӀаяхьар лоархӀаме да бахархой чоалхане хьал эттача моттигага кийчбара, цо ший аргӀагӏа таро лу мехка кхерамзлен боарам лакхбе.
