Дагалоаттама кхетаче дIайихьар ГIажарий-Юрта
1992-ча шера вай къаманга кхаьчача бала хетаяь кхетаче дIайихьар, ГIажарий-Юртарча культуран ЦIагIа. Гулбеннараша дагалаьцар, цхьаккха бехк боацаш, дахачара дохадеш адама тIаоттадаь Iазап.
«Библиотеканна кулгал деш йола ИсаевгIар Альбика яр, кхетаче хьаеллаш къамаьл дIадоладаьр. 1992-ча шера хиннача хатара хетадаь книжкаш гойтар цо наха. Цу дийнахьа эттар шоай бIаргашца дайнараша дийцачох оттадаь дар уж. Уйла яь ца валлал доккха Iазап да шоай даьй лаьттара арабовла безача кхаьча хиннача гIалгIаша лайнар», - дийцар «Сердалога» цу моттигера.
Гулбеннарашта гойтар документальни кино. Деррига а дагадохийташ, дикагIа довзийташ дар гуш хиннар. ГIажарий-Юртарча №1 йолча ишкола дешархо волча Маькенаькъан Микаила массане дог тохадолийташ дуIа дир байнарашта тIера.
Гулбеннарашта юкъе бар из унзара ди шоай бIаргашца дайна къоаной. Коазой СаIида дийцар хинначох кхета ца могаш кхийстача адама тIаэттачох.
Ха дIаяхаяле а, човнаш ерзац, ерза йиш ярех а яц! Вайна юкъе тахан а дукха ба цига де доацаш нах байнараш, из бала вIалла а бай ца лураш.
