Малсаганаькъан КӀарцхала цӀерах йола парк тоаеш, болх дӀахьоргба Наьсаре
Шахьара дас белгалдечох, Малсаганаькъан КӀарцхала цӀерах йола парк боаггӀача боараме тоаяь, куц хувца вӀаштӀехьадоалаш дац. «ХӀара шера цхьацца балхаш дӀакхухь укхаза, бакъда эргадаьнна хоалуш хӀама хилац.
«Туризми хьаьша тӀаэцара гӀулакхи» яхача къаман проектага гӀолла, укх шера модульни библиотека оттае, тишденна гӀандаш, нувхий яьшкаш хувца, бурчолгаш оттаде вӀаштӀехьадаьннад тха, хӀаьта а гуш дола куц боаггӀача боараме дац. Парке дӀачуводаш йоаллача моартал тӀа тӀатеха кхера хувцаргба оаха, керда кхуркхолг оттабергба, иштта парка деррига доазув баьццардерзадеш болх дӀахьоргба, Дала аьннадале.
Цул совгӀа, кхера Ӏотоха болхлой оттабе лерхӀ оаха», - аьлар шахьара кулгал деча Оздой Руслана. Иштта кхыдола кердадараш а хургда парке: мах бала ца беза вай-фай, кофе хьаду моттигаш.
