СВО доакъашхочун Бопхой Казбека сийна Турпалхочун Парта хьайийллар
Галашкарча №3 йолча ишколе хьайийллар шоай юртхочун Бопхой Казбека сийна Турпалхочун Парта. Донбасс лораеш, Россе дӀахьош йолча лаьрххӀача операце, турпал волаш, валар хилар цун. Цига дакъа лоацаш бар ГӀалгӀайчен «Даьхен Лорбой ганза филиала викалаш.
«Бопхой Казбек велар 2024 шера, бекарга бетта 5-ча дийнахьа, лаьрххӀача операцен декхар кхоачашдеш. Цо сий долаш, деналца кхоачашдир ший бӀухочун декхар. СВО даькъ тӀа цо гойтача деналах, майралах цунна еннай Денала орден. Турпалхочун Парта хьаеллаш, цига дакъа лаца баьхка хилар цун доттагӀий, гаргара нах, цунца тӀема гӀулакх дӀахьош хиннараш», - аьлар «Сердало» газетага «Даьхен Лорбой» яхача ганзе.
Бопхой Казбек ваьвар 1988 шера оагӀой бетта 11-ча дийнахьа. 2005-ча шера цо ший хьамсарча юртара ишкол яьккхар, эскарера цӀавеначул тӀехьагӀа, из балха дӀаийцавар патрульно-постовой гӀулакха тӀа. ТӀем тӀа латташ, из нийсвелар тохкамхой роте, из эггара халагӀча кхаьчар. Бакъда ше кхерамеча наькъ тӀа вар аьнна, юхаваланзар из, валара ха тӀакхаччалца, Даьхенна мутӀахьа волаш чакхваьлар.
«Денал долаш, майра, юхаваргвоацаш - иштта вар оал Казбек цунца цхьана хиннача бӀухоша. Цо цкъа новкъостал даь Ӏийнадац, унзарча гӀозара юкъера ший тӀема новкъостий арабоахаш. ХӀанз цу майрача бӀухочох-бокъонца волча Даьхен воӀах дувцаргда берашта урокаш тӀа, массайолча хана Даьхе лораеш лаьтта бӀухо дагалоаттавеш», - аьлар кхетачен доакъашхоша.
