Бокъо йоацаш, соцадаь лаьтта 218 эзар сом хьаделар
ГӀалгӀай Республикан Магаса прокуратуро техкар, моттигерча яхархочунна пенсионни бокъонаш телхаеш дола гӀулакх. Цига прокуратуро болх дӀабихьачул тӀехьагӀа, бокъонах доацаш соцадаь лаьтта 218 эзар сом хьаделар, яхаш, дийцар «Сердало» газетага.
«Дикка ха яьнна, пенси ийдеш йола кхалсаг я из. 2003 шера наджгоанцхой бетта цун ха яьнна хиларах луш дола пенси, Волгоградски областа Россе Соцфонда отделене говзанчаша лаьрхӀар 14 эзар сом кӀезигагӀа доагӀа, аьнна. Цун бахьан дар 1989 шера денз 1993 шерга кхаччалца из балха хиннача моттигера справка - мехка гӀолла долча алапел дукхагӀа ахча цун хилар», - аьлар хоамо.
Бакъда тӀахьожам баьраша белгалдаьчох, ха яьнна хиларах сага луш дола пенси юхадаккха бокъо я, нагахьа санна из пенси хьадоладалийта даьха каьхаташ нийса деце.
Прокуратуро из бахьан укх юкъе цахилар белгал а деш, цох доагӀаш дола дехар суде чуделар, пенсионни болхлоша леладер нийса цахилар а, иштта хьа ца луш соцадаь пенси хьадала дезаш хилар а хьалхадоаккхаш.
ГӀалгӀай Республикан Магасерча судо прокурора дӀадехар кхоачашдир.
