Жӏакех хьалхале яккхара яхьаш хилар Магӏалбике
Магӏалбика кхален ишколашта юкъе дӏайихьача жӏакех хьалхале яккхара йолча яхьах бокъонца дола хьаькъала а спорта а цӏай хилар. Яхьаш дӏайихьар, Соагӏапчарча № 30 йолча юкъерча ишколан тхов кӏалха. Из кхетаче вӏашагӏъеллар а кийчъяьр а яр «Спорткомитет - Спортивни ишкол» яха ДО, Магӏалбика кхален дешара урхалле. Кхетаче тӏаерзаяь яр дешархошта юкъе хьаькъала таронош гойташ дола ловзараш доаржадара а дезадалийтара а, иштта дикагӏа ловзараш гучабахара.
«Яхье дакъа лоацаш хилар Магӏалбика кхален дикагӏа бола жӏакех ловзараш. Къонача спортсменаша гойтар ловзара лакхара боарам, коталонга кхача гӏерташ хилар, уйла е ховш хилар. Яхьаш кийчъяьр а цар керттера кхелахо а вар Магӏалбика кхален физически культурах болча хьехархой методически цхьанкхетара кулгалхо Кхоартой Темарлан. Цун поалхамо нийсхо йолаш чакхъяхийтар ювцаш йола яхьаш», - дийцар из моттиг вӏашагӏйоллаш къахьийгарий викалаша.
Къонача, начӏал долча берий аьттув баьлар шоашта карагӏдоалар дизза гойта.
